Магасерча кулгаш гӏортадарах йолча яхьашка дакъа лаьцар ИнгГУ студенташа
Магасерча спортах, туризмах, культурах йолча моттиго кулгаш гӏортадарах дӏахьош хиннача яхьашка дакъа лаца эттар шахьарерча университета студенташ, «Марем» яхача гимназе дешархой.
«Яхьаш хетаяь яр вай къам, цхьаккха бехк боацаш, мехкахдаьккха хийрача Казахстане ӏодахьийтача денна. Кхоана лораш, юристаш, экономисташ, хьехархой хинна дӏаоттаргбола нах, тахан шоай говзал гойташ бар яхьашка. 56 саг вар коталонга кхача гӏерташ къовсавеннараш», - дийцар «Сердалога» цу моттига кулгал деш волча Янданаькъан Абте.
Эггара дикагӏа къовсабелар цу дийнахьа педагогически факультета студенташ, шоллагӏча моттиге эттар кхоана хургбола юристаш, хӏаьта кхоалагӏа моттиг физмата кхаьчар.
60 кийла дозал дарашта юкъе дошо майдилг яьккхар Налганаькъан ӏаьлас, 70 кийла дозалах белгалваьлар «Марем» гимназера Цӏечой Амир, хӏаьта хьехархо хила везаш вола Булгухчанаькъан Мухьмад-Амин, 80 кийла дозал дарашца къовсавенна, белгалваьлар.
Хьалхара моттиг яьккхар юридически факультета студента Беканаькъан Мухьмада, хӏаьта экономист хила везача Гӏогӏенаькъан Казбека 90 кийла дозал дарашта юкъе котало яьккхар.
