Шолже шерра дездергда, Сийлахь-боккхача тӏема Котало яьккха 81 шу дизар
Маьтсела бетта 9-гӏа ди долаш, Шолжерча культуран Цӏен хьалхашкарча майдан тӏа цӏайна хетаяь кхетаче хургья. Гӏалгӏайчен бахархой, хьаьший цхьана хургба; Сийлахь-боккхача тӏема турпалхоех бола дагалоаттам дӏахьош.
«Цӏай дӏахьоча дийнахьа доккха концерт лургда, керттерча сцена тӏара хозаргда вӏалла довш доаца тӏема- патриотически дешаш; Даьхенах, безамах, деналах дола иллеш. Цига дакъа лоацаш хургба республикан Хамхой А. цӏерагӏча Паччахьалкхен филармоне солисташ, республикан хьалхале лелаю кхоллама тоабаш», - аьлар «Сердало» газетага Гӏалгӏайчен Паччахьалкхен филармоне зарбан болх лелабераша.
Укхаза йоаржаергья тӏема хьалашкара даара моттиг. Бе-бе гойтамаш дӏахьош, хьаьшашта довзийтаргда вай мехкахошта карагӏдаьннараш, истори. Коталон Ди долаш, гуш хургба, машаре вахар бахьан долаш шоай синош дӏаденнача бӏухоех бола дагалоаттам.
