Иштта хургба Наьсарера Ӏам, 2025-гӀа шу чакхдоалаш
Наьсарера Ӏам тоабара проект котъяьлар шахьара дика хьалаш хьакхоллара йолча Ерригроссийске яхье, из бахьан долаш, 2025-ча шера из тоабергба геттара чӀоагӀа эргабоаккхаш, яхаш, дийцар «Сердало» газетага Наьсарен-Шахьара зарбан болх лелабераша.
Шахьара Ӏам тоабара болх дӀаболабеш йола «Хьалхара» оагӀув гойтар 2024 шу чакхдоалаш, юкъарлон кхетаче йолча хана. Тохкама балхаш дечар цу хи тӀа ресторан а, дӀа-юха лела кхуркхолг а хургбола балхаш гойтар, иштта цига хьалде лерхӀ ахкан дийлла театр, чкъаьрий лувца моттиг а кийчъергья.
Наьсарен кулгалхочо Оздой Руслана, мэре балха тӀа кхетаче дӀахьош дийцар, проекта цхьадола доакъош.
«Таханарча наьсархошта шин оагӀорахьа бовз из Ӏам: тоабаь, керда спортивни майдаш йолаш; иштта безам тӀагӀоргбоацаш, хӀара шера йохаеш лампаш, гӀандаш долаш.
Оаха лаьрхӀад из доазув 5 даькъа дийкъа хилийта: кхетаченаш дӀаяхьара, маьлхе валара, боккхийчар салоӀаш, гилкемаш хехкаш, спортивни оагӀуви цунна юхе хи тӀара ресторани йолаш», - аьлар кулгалхочун гӀончас Мархенаькъан Миланас.
Ший аргӀагӀа, Цӏечой Басира гойтар къаман Ӏадатех йолча белгалонашца кийчъяь хургйола оагӀонаш: «Ӏам тоабарах кхоачам хургбац; из болх, туристий теркам тӀаозаш, къаман белгалонца Ӏама хозал хьагойташ хила беза».
Наьсарен кулгалхочо Оздой Руслана проекта юкъе цхьадола кердадараш доаладир: хӀанз берригача Ӏама гонахьа лиспеда никъ буллургба, машинаш Ӏооттае моттиг хургья, хӀаьта Ӏам чу форда гӀажаш, мах бола тайп-тайпара чкъаьрий хургда.
