Бусалба динцарча тӏехьален гойтаме, Гӏалгӏайчен ӏадатех дийцар
«Россе бусалба дин тӏехьале: къамаш, ӏадаташ» яха оагӏув хьабеллаш, болх дӏабихьар Москверча рузбан маьждиге. Россе къамий цхьоагӏон Шера, Казань яхача шахьарах исламски дунен культуран столица лоархӏаш хилар дездара хетабаь болх бар из. Москве Татарстана культуран Денош доаржадарца дӏахьош гӏулакх да из; РФ ДУМ, Минкульто, Къаман музейс хьаллоацаш. Гойтама доакъашхошта юкъе Дзовранаькъан Танзила - «Истинг» яхача ферта кӏувсий Ассоциаце кулгалхо, кхоллама балхех йолча Паччахьалкхен музея кхоллама болхло.
«Дзовранаькъан Танзилас музее гулбеннарашта довзийтар гӏалгӏай къаман юкъе даьржа хиннача фертах кӏувсаш (истингаш) хьадара ӏадатаца дувзаденнараш. Цу балхацара керттердараш, тханца къахьегар мишта хила деза хайра царна, иштта шоай кулгашца из болх бе хьежар уж. Хӏаьта берашта лаьрхӏа къаьстта программа кийчъяьяр цига: тайп-тайпара бесаш долча кхоачамца болх дӏахьош, зӏамига кӏувсилгаш хьадеш, гӏалгӏай къаман кӏоарга, дӏаьхий дола ӏадаташ довзаш хилар уж цига. Дзовранаькъан Танзилас вай къаман ӏадаташцара, культурацара тайп-тайпара кулгацара балхаш доаржадарах, дийндарах йола проект йовзийташ лекци йийшар гулбеннарашта. Эггара хьалхарча Кавказерча «Истинг» Ассоциацех, къаман юкъе тхьоврача ханашкара денз хьадахьаш дола ӏадаташ тӏехьа тӏайоагӏача тӏехьенга дӏакхачийтарах дийцар цо», - йоах «Сердалога» ИЗО Паччахьалкхен музея зарбан болх лелабераша.
«Россе бусалба дин тӏехьале: къамаш, ӏадаташ» яхача гойтаме боккхача мехка дахаш долча бусалба къамий ӏадаташца, культураца дувзаденна дукха хӏама дар, иштта кулгашца хьакхелла говза балхаш. Дзовранаькъан Танзилас ший проекта юкъе чулаьцадар керттердараш. Гӏалгӏай культурага гӏолла Россе къамий тайп-тайпара дола гӏулакхаш, истореца лоархӏамедараш дайзар гойтаме гулбенна хиннарашта.
