Россе Минкульта хоржам беча яхьашка котало яьккхар вай мехкарча кхаь библиотеко
Федеральни оагӏонца гӏо дара тӏехьа дӏахьош долча хоржамий яхьашка котало яьккхар вай мехкарча кхаь библиотеко. Культуран гӏулакхех йолча Россе министерствос «Дезал» яхача кердача къаман проекта «Дезала юкъера лоархӏамедараши культураца дувзаденнараши» яхача оагӏонга гӏолла дӏахьош, 2027-ча шера рузкъанца гӏо деш болх ба из. Белгалде деза, цу яхьашта юкъе дакъа лоацаш хиннараш вай боккхача мехка дукха хиннилга, хӏаьта вай республико котало яьккхар; гойташ хинна проекташ лоархӏаме, пайда боаржабеш хиларах.
«Модельни муниципальни библиотека хьакхоллача оагӏонца котало яьккхараш Наьсар-Кертера Наьсарерча ЦБС библиотека-филиал я (кулгалхо я Дебаранаькъан Ф.), Шолжа кхален ЦБС Галашкара библиотека-филиал №1 (кулгалхо я Тоачанаькъан М.). Модельни библиотекаш царех хьаяьчул тӏехьагӏа, деррига боаггӏача боараме меттадоаладеш доккхий хувцамаш хургда цар чу. Керда книжкаш, эшаш мел бола кхоачам хьачубахьаргба цига. Берий культуран оагӏонцара моттиг хьаяра тӏехьа котало яьккхар Шолжа кхален ЦБС Алхастерча библиотеко-филиало №22 (филиала кулгалхо Базгенаькъан М.). Берашта, кагирхошта цхьацца балхаш дӏакхахьа таханарча ханага хьежжа моттиг къоастаергья цу чу», - «Сердалога» из хоам бера Янданаькъан Джамалдий цӏерах йолча къаман библиотекера.
Библиотекашкара Таханара библиотекашкара хьал хувцаш, кердадараш юкъедоаладеш цигара болх тоабе аьттув луш гӏулакх хургда цох. Къаьстта терко ергья дегӏа могашал эшаеннача наха аттагӏа, паргӏатагӏа хилийтара тӏехьа болх дӏахьош.
Хӏаьта библиотекашка болх бечар кердадараш довзаш, шаьрдеш къахьегаргда.
