TV BRICS хургья «Дошо гӏала» яха фестиваль дIохьоча хоамий новкъост
Гӏалгӏайчен кинематографистий Союза моттигерча даькъа кулгалхочо Зортанаькъан Мадинас дийцар видеога гӏолла TV BRICS яхача халкъашта юкъерча бувзама кулгалхошца балха гIулакхаш леладара хаттараш. Онлайн керттера хаттар дар хоамий бувзам лелабар. Медиа таронашца гойта лаьрхӏад Хӏӏ-гIа Халкъашта юкъера «Дошо гӏала» яха кинофестиваль дӏахьош хилар.
«Из могадеш долча хаттарца Зортанаькъан Мадинайца бувзаме яьлар арахьарча медиабувзамий наькъий департамента кулгалхо Бочарова Елена, иштта Евразе даькъ тӏа дадача мехкашца болх бара йолча отдела кулгалхо Сидорова Ирина. Цар могадир цу фестивала чудоагӏаш, лаьрххӏа дола совгӏат де, цунга гIолла таро хургья ший болх медиа бувзамашка гойта. «Дошо гӏала» чаккхено, TV BRICS портале, иштта Ингалсий, Китая, Португале, Испане, ӏарбий мехкашка уж гойта лерхӏ. Фестиваль хьалоацаргья халкъашта юкъерча медиа бувзамашка», - аьлар «Сердало» газетага Гӏалгӏайчен кино, театра, укх заман тароний Центре.
Цига дийца хаттараш безам тӏабодаш дар. Зортанаькъан Мадинас аьлар, цхьана бувзам лелабаро халкъашта юкъера кинофестивала бувзам чӏоагӏбу, хӏаьта котваьнначун таро я кхыча къамий бахархошта ший болх гойта.
TV BRICS медиасеть хьакхеллар 2017 шера БРИКС мехкий КНР саммит дӏахьош. Проекта лаьрхӏар Бразиле, Россе, Инде, Китая, Къулбехьен Африкан бувзам лелабара баь барт чӏоагӏбе, цу тайпара цхьана хоамаш гойташ йола оагӏув йоаржае.
