Гӏалгӏайчен тхэквондиста Яхьяевгӏар Билала олимпийски оагӏув чӏоагӏъеш латт
Яхьяевгӏар Билал халкъашта юкъерча класса спорта мастер яха цIи йолаш ва, цо яьккхар Гран-при дунен сере даькъ тӏарча пара тхэквондох борза майдилг. Яхьаш дӏахьош яр Къулбехьен Кореерча Мужу яхача шахьаре. Лакха дозал долаш (К44 яхача категоре, 80 кг совгӏа), российски латархо коталон моттиг яккха лаьрхӏа вар, цо шиъ котало яьккхар, Бразиле, Ирана мехкашкарча спортсменашца яхьеваьнна.
«Ах финал йолаш, тренерий штабо лаьрхӏар, спортсмен турнира тӏара ӏоваккха, цун чов кхы а чӏоагӏагӏа кӏоарглургья, аьнна, хеташ. Цу тайпара, борза совгӏат, иштта 2028 шера хургдолча Олимпийски ловзарашка ваха таро луш йола очкош а хилар цун. Ши кӏира кхы даьлча, Билала аргӏанарча халкъашта юкъерча яхье хила веза. Из дӏахьу Лондрина яхача Бразилерча шахьаре», - аьлар «Сердало» газетага Гӏалгӏайчен спорта Министерстве.
Олимпийски ловзарашка вахара хьал кердача боарам тӏа доалаш доагӏа. Хӏанз хӏара атлета лоархӏаме да моллагӏа йола спорт дӏахьош хилар. Дика дӏайихьача яхьашка, хӏара яьккхача майдилга лакха мах бола очкош яхь, цо вуг спортсмен лаьрхӏачунга - 2028 шера Лос-Анджелесе хургдолча Олимпийски ловзарашка.
Ший хьехамчас кулгал а деш, из чоалхане никъ укх диъ шера дӏахьош ва Яхьяевгӏар Билал. Тренера Къамурзой Ахьмада тӏахьожам лоаттабу тренировкашта, ше кхевеш вола спортсмен дунен спортага, 2028 шера хургйолча Олимпиадага кхоачаву цо.
