«Кавказа Лига» яхача яхьашка, белгалбаьлар вай тхэквондисташ
Хасавюрте дӀайихьача кагирхошта юкъерча тхэквондох йолча «Кавказа Лига» яхача яхьашка кхоъ дошо, шиъ борза майдилгаш яьхар вай спортсменаша.
Из хоам «Сердалога» бир спорта гӀулакхех йолча министерство. СКФО моттигашкара гулвеннача 300 совгӀа волча лакха говзал йолча спортсмена юкъе, дикка белгалбаьлар вай тхэквондисташ.
«41 кг дозал Мержой Ӏаддал-Малика, 30 кг дозал долча МутаӀаланаькъан Мухьаммада, 26 кг волча Тебой Азамата дошо майдилгаш яьхар. Борза майдилгаш яьхараш - Хьаьшанаькъан Мухьаммад (34 кг), Налганаькъан Ӏимран (24 кг). Иштта коталонга кхача гӀерташ лакха говзал гойтарах совгӀат денна белгалвир Налганаькъан Мухьмад-СаӀид. Спортсмений хьехамчаш ба Меданаькъан Ахьмад, Хамхой Хьусен, Цисканаькъан ИбрахӀим, Къамурзой Илез, Къамурзой Хамза, Гаьгенаькъан Мухьаммад», - дийцар спорта гӀулакхех йолча Министерствос.
