«Кавказа бераш» яхача яхье 10 майдилг яьккхар вай тхэквондисташа
ГӀаьбартой-Балкхарой мехка дӀайихьача «Кавказа бераш» яхача ерригача Россе яхьашка 10 майдилг яьккхар вай тхэквондисташа. 10 шергара 17 шерга кхаччалца бола спортсменаш бар цу юкъе дакъа лаьцараш. Из хоам «Сердалога» бир спорта гӀулакхех йолча министерствос.
250 спортсмена дакъа лоацаш хиннача яхьашкара 3 дото, цаӀ борза майдилгаш ера вай спортсменаша. Дотув даьккхараш: Цхьорой Микаил (45 кг), Хуценаькъан Мухьмад (33 кг), МутаӀаланаькъан Мухьмад (30 кг). Борза майдилг ера Кокурхой Ӏийсас (57 кг).
Белгалъяьлар зӀамагӀчар тоаба: 2 дошо, 1 дото, 3 борза майдилгаш ера цо. «Котало яьккхар Мержой Ӏаддал-Малика (41 кг), Мержой Мухьмад-Салима (45 кг). 28 кг дозал дарашта юкъе дотув даьккхар Къамурзой Мухьмад-Басира. Борза майдилгаш яьхараш: Зурабанаькъан Ӏимран (45 кг), Меданаькъан Адам(33 кг), Циздой СаӀад ( 32 кг). Царна хьалха лаьтта хьехамчаш: Къамурзой Ахьмад, Меданаькъан Ахьмад, Хамхой Хьусен, Цисканаькъан ИбрахӀим, Къамурзой Илез, Гаьгенаькъан Мухьаммад, Къамурзой ӀабдуллахӀ-Усама, Къамурзой Абубакар», - дийцар министерстве.
