«Оаздик» яхача берий салоӏача моттиге хилар ТЮЗа актёраш
Жӏайрахьа кхален лоаман хозача моттиге уллача «Оаздик» яхача бераша салоӏача лагере баха хилар вай мехкарча берий театра актёраш. Бӏарчча цӏай дар берашта цига оттадаьр. Дерригача берашта санна боккхийбарашта а геттара чӏоагӏа езаенна йола, Токмокав И. пьесах «Йишилг Алёнушкаи вошилг Иванушкаи» яха спектакль гойтар цар цига.
«Режиссёр хинна, цу балха хьалхаэттар къаман цӏихеза артистка Ховтанаькъан Лейла я. Хӏаранена бера хана денз бовзаш бола фаьлг таханарча ханага хьежжа бӏаргабайтар актёраша.
Белгалде деза, иштта йола кхоллама оагӏонцара кхетаченаш берашца дӏакхахьар лоархӏаме, цар дог ураоттадеш долга», - дийцар «Сердалога» ТЮЗе.
Лагере театр дарах берашта доккха совгӏат хилар. Теникашцара болх шоаша мишта дӏахьу гойтар актёраша. Иштта хьажархошта гуш, довзаш доаца шоай театральни балхацара гӏулакхаш, берашта чӏоагӏа тамашийна хетараш довзийташ, ха яьккхар ТЮЗа болхлоша.
Теникашца цар дер де хьежача бераша кхетадир, царна доал де, уж ловзае хар бӏарчча кхоллам болга. ТЮЗа актёраши лагера вӏашагӏтеха тоабеи волейболах ловзаш яхь хилар цига. Хӏаьта чаккхе, моллагӏча фаьлгаца санна, дикадар - доттагӏал котдоалаш хилар.
