Россе къамий театрий ӏӏӏ-ча Фестивале дакъа лоацаш я вай мехкара ТЮЗ
Набережные Челны яхача шахьаре дӏайихьача Россе къамий театрий ӏӏӏ-ча Фестивале дакъа лоацаш хилар вай мехкара берий театр.
«Федеральни проектага гӏолла, шоай балхаш довзийташ хилар вай мехкара, Марий Элера, Хакасера, Татрий мехкара театрай тоабаш. Боккхача мехка дахаш долча массадолча къамий культураш, истореш, ӏадаташ лорадар мел лоархӏаме да белгалдеш дар уж балхаш.
Укх бетта 22-ча денгара 18-ча денга кхаччалца хьажа аьттув хургба наьха Горномарийски драматически театра актёраша Лесков Н. «Левша» яхача йоазонах оттаяьча спектаклага, вай мехкарча берий театра актёраша оттабаьча «Дегаза боабашка кӏориг» яхача фаьлгага, Хакасски къаман драматически театро Казнов Тимура пьесах оттаяьча «Аре. Кхеран илли» яхача эпически ашарий драмага, иштта кхы а дуккхача спектаклашка», - дийцар тхога вай мехкарча культуран гӏулакхех йолча Министерстве.
Пресс-конференци хьаеллача дакъа лоацаш бар татрий культурах йолча Министерствон хьалхалатта Аюпова Ирада, Россе къамай театрий фестивалий кулгалхо Афанасьева Н., Набережные Челны яхача шахьара цу оагӏонцарча комитета кулгалхо Салахов Ф., вай мехкарча берий театра кулгалхо Хазанаькъан Муса. Из гӏулакх дӏахьош хиннараш бар вахара, культуран гӏулакхех йола Москвера «Столица» яха ганз, РФ культуран гӏулакхех йола Министерство, Татрий республикан культуран гӏулакхех йола Министерство.
