Халкъашта юкъерча филологий кхетаче дакъа лоацаш хилар вай мехкара хьехархо
Халкъашта юкъерча филологий Петербургерча кхетаче дакъа лоацаш хилар Магасерча лицее-берий беша эрсий мотт, литература хьехаш йола Могушканаькъан Фатима. Дешарах йолча Российски академе президент, СПбГУ ректор, цӏихеза филолог йолча Вербицкая Людмилай 90 шу дизара хетаяь яр из моттиг. Берригача мехкара, иштта доазол арахьара паччахьалкхен меттацарча политикан, филологе, ӏилман говзанчаш гулбеннабар цига.
«Эрсий мотт лорабара, цун хӏама тоадара тӏехьа кхоачашде дезарех дийцар кхетаче гулбеннараша. Къамашта юкъерча бувзаме лоархӏаме моттиг дӏалоацаш болча эрсий метта хьалах дийцар гулбеннараша. Эрсий метта, литературан оагӏонашца дувзаденнараш белгалдир лоархӏамеча кхетаче», - йоах «Сердалога» бенача хоамо.
Магасера хьехархо иштта йоккхача кхетаче дакъа лоацаш хилар боккха пайда боаржабеш, вай хьехархой лакхача моттиге латтилга белгалдеш да.
