Хаоттам хувцабаларга хьежжа, кхерамеча моттигий хьал тохкаш ба мехка
Догӏаш лаьтта, ӏаьржа хиш дахкарах, мехкара эсала моттигаш ма хулла лораеш, фийла долаш хила, аьнна, тӏадиллад вай мехкадас Келаматанаькъан Махьмуд-ӏаьлас. «Сердалога» из хоам бир мехкадаь зарбан болх лелабераша.
«Геттара чӏоагӏа лаьттача догӏаша хиш айдаьд, бакъда вай мехка хатар хинна моттиг яц. Цхьаццайолча моттигашка токаца хинна кхоачамбоацараш сиха меттадоаладир цу оагӏонцарча къахьегамхоша.
Хиш айдалча хила тарлуш долча хатара духьала болх дӏахьош хиннабар вай мехка хьалха. Федеральни оагӏоно гӏо деш Галашкарча Эса гонахьарча, Наьсарен кхалерча Яндар яхача хин гонахьарча берда моттиг чӏоагӏъеш боккха болх чакхбаьккхабар. Россе Президента йоаржаяьча къаман проектага гӏолла, дикка къахьегаш тоадаьдар Илдарха-Гӏалий тӏара, Эккажкъонгий-Юртара, Юкъерча Ачалкхера тӏаьш», - белгалдир вай мехкадас Келаматанаькъан Махьмуд-ӏаьлас.
Республикан кулгалхочо цу оагӏонцарча болхлошта тӏадиллар, догӏаш латташ хиш айлуча деношка, чӏоагӏа фийла, моллагӏча хӏаман духьалъотта кийча долаш хила, аьнна. Къаьстта йоккха терко еш дийцар Жӏайрахьа кхален моттигех, хӏана аьлча, лоаман лакхерча моттигашка уллаш дола лоа дашаш хуле, хиш айлургда.
«Дӏадахача салоӏаш хиннача деношка чӏоагӏа догӏаш лаьттар Къилбаседа Кавказа моттигашка. Селий, Нохчий мехкашка эттар доккха хатар да, хиш айдаларах. Вайца вошал долча мехкашта сайгара эшаш дола гӏо де кийча ва со тахан», - белгалдир вай Мехкадас.
Къаьстта терко йир республикан кулгалхочо моллагӏа хатар хилар кхерам бола хьал эттача бахархошка ханнахьа, боаггӏача боараме хоам бара. Геттара чӏоагӏа лораде деза бераш, хин моттигашта гаргагӏоргдоацаш. Машинашца лелараш а чӏоагӏа фийла хила беза ха я эттар.
