Даьхен лорабой Денна хетаяь денала урокаш хилар мехка
Даьхен лорабой Денна хетаяь денала урокаш дӏахьош хилар вай мехка Тохкама оагӏон болхлой. Из хоам «Сердалога» бера цу моттигера.
«Вай мехкарча РФ Тохкама комитета оагӏонца юкъарлон-политически балхах вола Горчхананаькъан ӏумар, воккхагӏвола тохкамхо Йовлой Ахьмадхан Яндарерча Гӏаьнажанаькъан А. Р.цӏи лелаеча № 2 йолча ишколе кхетаче дӏахьош хилар», - йоах тхога бенача хоамо. Цига дийцар Даьхенцара безам чӏоагӏбеш долча гӏулакхех, къаман денал долча турпалех, иштта ӏаьдала бокъонашка хьежжа хӏама лорадеш хила безарах.
Магӏалбике лаьттача тӏема юкъе вахар хаьдарех дийцар кхетаче. Цӏеча эскара эзараш салтий, эпсараш, фашист ше бенача наькъах дехкевоаккхаш, вай лаьтташкара аравоаккхаш духьале еш хиннаб. Россе Сийлахь-боккхача Даьймехка тӏема истореца чӏоагӏденна латташ хӏамаш да уж.
Иштта хьаьшаша дийцар Россе Тохкама комитета оагӏонца дӏахьоча балхах, цунна хьалхашка латтача декхарех. Кагирхоша мел деннача хаттарашта жоп луш, царна цхьаццадараш дикагӏа довзийташ, къамаьл дир тохкамхоша.
Къонабарашта хьалхадаьккхар, интернета оагӏонашка гӏолла тийшаболх лелабеча, кагирхой терроризм яхача зулама юкъебига гӏерташ кхестарашца цхьаккха тайпара бувзам лелабе, цар яхар теркалде йиш йоацилга. Иштта йола кхетаченаш кхувш латтача тӏехьенна чӏоагӏа лоархӏаме я. Даьхенцара безам чӏоагӏбара тӏехьа, боккха болх дӏахьош къахьег тахан кагирхошца.
