Республикерча дарбанчешка, лоархӀаме дола 7 тайпара гӀирсаш кхаьчад
Таханарча ханага хьежжа дола керда, хӀетта хьадаьнна гӀирсаш оттадаьд укх шера ИРКБ, республикерча онкологически диспансере, МагӀалбикерча, Шолжа-Шахьарерча дарбанчешка. Из хоам «Сердалога» бир Мехкадаь зарбан болх лелабераша.
Республикерча керттерча дарбанче пехкашка дикагӀа садоахийташ йола йиъ аппарат оттайир; МагӀалбикерча, Шолжа-Шахьарерча дарбанчешка узи йоаха аппараташ оттаяьй.
«Республике дарба дар боаггӀача боараме хургдолаш, эшаш мел дар Ӏалашде гӀерташ, къахьег оаха. Керда хьадаьнна дикагӀа дола гӀирсаш хиларо дарба нийса де, унахочун хьал ма дарра довза аьттув хулийт. Цу гӀулакхо дикка аттача доаккх дарбанчешкара гӀулакх», - белгалдир вай Мехкадас Келаматанаькъан Махьмуд-Ӏаьлас.
ДӀадахача шера вай мехкарча дарбанчешка кхаьчар ийс лоархӀаме гӀирс. Царна юкъе яр узи йоаккха аппараташ, компьютерни томографи. «УнахцӀено» яхача къаман проектага гӀолла дӀахьош, беркате болх ба из.
