2026 шера ГӏалгӀайчен 4 юрта хьаелларгья спортивни майдаш
ХьатӀадоагӀача шера республикан гӀишлон Министерстве хьалъе лаьрхӀад керда спортивни майдаш МагӀалбика кхален Дабе-Юрта, Инаркъе, Шолжа кхален Мужеча, иштта Шолжа-Шахьаре. Цу дерригача балхашта хьахьожадаьд 69 млн сом. Цох «Сердало» газетага хоам бир ГӏалгӀай Республикан паччахьалкхен зарбан болх лелабераша.
Хоам бу, лакхехьа белгалъяьхача юрташка пхе моттиге лаьтташ хьакъоастадаьд спортивни доакъошта лаьрхӀа. Хӏаьта проекта организаце - «Геопроект» ООО - болх дӀаболабаьб проектно-ахчан каьхаташцара. Хӏанз хьахаржа езаш я болх бергбола тоабаш.
«Майдан тӀа хургда футболах ловзара лаьрхӀа хьакъоастадаь арен дакъа, 20х40 доккха долаш, нах хьажара йола трибунаш, воркаута даькъа спортивни гӀирсаца. Иштта хьалъе лаьрхӀад баскетбола майда. Гӏашлой никъ а тоабергба. Воркаут-дакъа турникашца, хенашца, кхыча гӀирсашца Ӏалашо яь хургда, тӀехнахьа хьамча оаса баха хургда ловзар дӀахьош дола лаьттан дакъа», - аьлар гӀишлон боахаме.
Белгалду, из проект кхоачашъергья «Физически культура, спорт дегӀайоалаяра» республикански программах.
