Магаса администраце бийцар, «Хьалхарчар болам» дегӏаахара никъ
Магаса мэре балха лостам телача кхело ший кхетаче дӏайихьар, цига дийцар «Хьалхарчар болам» яхача моттигерча даькъа болх дегӏабоалабара керттера дешаш, иштта белгалдир карарча шера баьча балхага хьажа безаш хилар. Кагирхой боламца бувзам лелабара хетаяь кхетаче дӏахьош яр столицан администраце кулгалхочун гӏонча Заьзганаькъан Макка.
«Кхетачен доакъашхоша дийцар тӏеххьарча кхаь бетта баьча балха толамех. Пхьошанаькъан Мухьмад ва «Хьалхарчар болама» болх лелабара керттера говзанча, цо гойтар кхоалагӏча квартале бе беза болх. Иштта белгалдир дешархой хьинар долаш хилар. Хьалхарчар моттигаша федеральни программаш дика юкъейоалаяьй, хӏаьта царна юкъе дакъа лоацараш ди тӏехьагӏа тӏакхеташ боагӏа.
Магаса мэре вахарца дувзаденнача дешай даькъа кулгалхочо Куштанаькъан Светланас дийцар, ӏаьдала викалашца цхьана болх дӏахьош хиларах. Цо белгалдир, дешара Денна хетаяь линейкаш, лоӏамхой боламаш Даьхенцара безам совбоаккхаш, мехка истори довзийташ хиннилга», - аьлар «Сердало» газетага Магас-Шахьара администраце кепайоазон болх лелабераша.
Балха лостам телача кхела вIашагIкхетар чакхдоалаш, белгалдир лоархӏаме декхараш. Уж лаьрхӏа дар кагирхой хьаллацара.
Магаса администраце кулгалхочун гӏончас Заьзганаькъан Маккас цхьацца долча боахамашта де дезар хьалхадаьккхар, белгалдаь декхараш кхоачашдар духьа.
