Тов бетта Ӏаьлий-Юртара керда дарбанче болх бе йолалургья
Ӏаьлий-Юртара дарбанче тоаеш бола болх чакхбаьнна бала боалл. 7 эзар совгӏа адам дахача юртá, доккха совгӏат хиннад цу кердача гӏишлох. Таханарча дийнахьа цига болх беш цхьа йоккха йоаца амбулатори мара яц, цунга хьежжа бахархой Наьсаре аха безаш хул, лор эшаш моттиг хилча. Вай мехкада Келаматанаькъан Махьмуд-Ӏаьла ваха хилар цу балхага хьажа.
«Кердача дарбанче 30 унахочоа ӏовижа дарба де моттигаш хургья, иштта 100 саг дийнахьа тӏаэцаш поликлиника хургья цига. 2 эзар кв. метр доазув дӏалаьца дарбанче шозза вӏаштӏаръяь я, цу чу хургья терапевта, хирурга, берий лора, физиотерапе, кизга увттаду, иштта УЗИ кабинеташ. «Цаӏ йолча Россе» къаман программа «Дӏаьха, кадай вахар» яхача къаман проектага, «Унахцӏенон оагӏонцара хьал меттадоаладар» яхача проектага гӏолла 2024-ча шера тов бетта дӏаболабаь болх ба из. 230 млн сом ахча да цу гӏулакха хьахьожадаьр. Доккхагӏа дола балхаш кхоачашдаь баьннаб цига тахан. Ер бутт чакхбалале, юхедиса балхаш чакхдаьха баргба, тӏаккха унахой тӏаэцарга кийчо е еза цу чу. Тов бутт юкъекхаьчача хьаелла лерхӏ дарбанче, деррига а ма хетта чакхдоале», - йоах «Сердалога» мехкарча Паччахьалкхера бенача хоамо.
Керда дарбанче лерттӏа, боаггӏача боараме кийча хилийтара тӏехьа терко еш ва вай мехкада.
Дарбанчен гонахьара доазув, тӏабодаш бола никъ; машинашта паргӏата хургйолаш, дикка тоабаь хилийта, аьнна, тӏадиллад вай Мехкадас; цул совгӏа, машинаш ӏоувттаеш дола доазув къоастаде деза. Кӏарцхала, хьеха, цӏабала гаьнаш, зизаш, кӏотаргаш дӏайогӏаш баьццардерзадергда дарбанчен ков; наьха цига багӏа, ха дӏаяхьа аьттув хургболаш.
