Ӏаьлий-Юрта кердача дарбанчен гӏишло хьалйир
Гӏалгӏайчен гӏишлон Министерствон дехарах «Гранул» ООО компане бӏарчча кхоачашдир гӏишлон-монтажа балхаш, Наьсарен кхален Ӏаьлий-Юрта керда дарбанче хьалъеш. «Дӏаьха, дика вахар» яхача къаман проекта чуйоагӏаш йола из гӏишло хьалъяра хьожадир 229 миллион сом.
«Сердало» газетага Гӏалгӏайчен Министерстве ма аллара, из я шозза вӏаштӏара яь 2000 гаргга квадратни метр йола фусам. Цу чу хургья поликлиника, из лаьрхӏа я 100 саг цхьан сменах тӏаэцара, иштта дика хьалаш а долаш стационар я 30 сага лаьрхӏа.
Гӏишлон чухьнахьа деррига лаьрхӏа да лорашта, унахошта. Укхаза хьаелларгья терапевта, хирурга, берий лора кабинеташ, физиотерапе дакъа, вай заман кизга оттадар.
Гӏишлонхоша чакхдаьхад чура балхаш, коммунальни балхаш даь даьннад, гонахьара доазув тоадаьд.
Гӏалгӏайчен гӏишлон министра Иленаькъан Мусас белгалдир, юххьанца йиллача хана уж балхаш йистецадалар кхерам болаш дар. Бакъда Гӏалгӏайчен гӏишлон министерствос тӏахьожам лоаттабарах, «Гранул» ООО компане тӏехьара тӏа болхлой юкъе а баьха, технически оагӏорахьара дӏадехараш лора а деш, из болх сиха дӏабихьар. Цул совгӏа, министра тӏатехар, из лорий комплекс болх бе дӏайолаяра эшаш дола деррига каьхаташ кийча да.
