Россе къамий меттай Ди дездир Алхасте
Россе къамий меттай Денна хетаяь кхетаче дӏайихьар Алхастерча СОШ-ДС. Ишкола болхлоша, культуран цӏен къахьегамхошца цхьана дӏахьош кхетаче хилар цох.
«Вай боккхача мехка дукха тайп-тайпара къамаш дах тахан, хӏара къаман мотт бӏаьхий, ший тайпара ба. Дунен культураца лоархӏаме моттиг дӏалоацаш ба хӏара къаман мотт, хӏаьта цӏайца гулбеннарашта дӏагойтар мотт къаман ганз йолга», - дийцар «Срдалога» Алхастерча культуран Цӏен кулгал деча Боканаькъан Заретхана. Программо чулаьцараш дукха дар. Берашта дийцар хӏара къаман меттаца лерхӏам хила безилга.
Культуран оагӏонцара тӏехьале кхоанарча ноахалга дӏакхачийта езаш я, сий деш. Меттаех, ӏадатех, Россе тайп-тайпарча къамий культурех йола викторина дӏайихьар цига. Бераш чӏоагӏа дог айденна кхестар.
Боккхача мехка дӏаьхий долча исторех дувцаш, байташ йийшар сцена тӏа, иштта «Горянка» яха ансамбль яр ший начӏал гойташ. Белгалде деза, иштта йолча кхетаченашка дакъа лацаро берашта боккха пайда белга, мехка истори довзийтилга.
