Алхасте белгалдир Россех ГӏалгӀайче дӀакхийтта 256 шу дизар
Алхастерча культуран ЦӏагӀа «Даим цхьана» яха тематически сахьат дӀадихьар, из хетадаь дар ГӏалгӀайче, ший лоӀаме йолаш, Россе паччахьалкхенах дӀакхийтта 256 шу дизара.
«Кхетаче дӀахьош хиннача Загӏенаькъан Адама довзийтар берашта истори, цо дийцар 1770 шера вай къаман вахаре нийсъеннача исторически оагӀонах. Берашта дайзар, укх дукхача шерашка кхыча къамашца цхьана, Россе доазош лорадеш, вай даьй турпалал, денал, майрал гойташ; вай дай лаьтта хилар», - аьлар «Сердало» газетага из болх вӀашагӀбеллараша.
Терко тӀаозаш бар тематически гойтам, из кийчбир юртарча библиотеко. Цига го таро яр гӀалгӀай къаман никъ гойташ дола истори, иштта ГӏалгӀайчен Россецара культуран бувзамаш.
Кхетаче дика дӀайихьар, Даьхенцара безам хестабеш йола байташ йийшар къонача артисташа. Цу тайпара кхетаченаш лоархӀаме я, цар таро лу берашта шоай мехка истори, къамашта юкъера доттагӏал дикагӀа довза.
