«Мир» картаца ахча дӏалуш хилча, 10 сом кходе аьттув ба автобусаца леларий
Маьцхали беттагара лайчилла беттага кхаччалца йолча хана, автобусаца дӏа-хьа ахар дарегӏа хургда мехкахошта. «Мир» яхача къаман картаца ахча дӏадалар итт сом чухьнахьа хургдолаш оттадаьд тахан.
Валидатор тӏа ший карта дӏатӏадилла, тӏера ахча ӏодаллалца сабарде мара дезац мехкахой, боагӏаш бола мах ше тӏера дӏаэц цу гӏирсо.
Таханарча дийнахьа бахархошка 380 эзар совгӏа цу тайпара карташ да. Смартфонаца а чакхбаккха йиш я из болх: ахчан карта телефонах «хьахетта» хила диза (масала Mӏr Pay). Минота кхоачашде йиш йолаш хӏама да из, цул тӏехьагӏа телефонага гӏолла тӏера ӏодоаккх ахча, итт сом чухьнахьа долаш. Цу оагӏонца дувзаденнараш банкагара хьатӏабенача хоамага гӏолла довзаргда бахархошта.
«2024-ча шера хиннача боламга хьежача, тахан шозза кӏезигагӏа хул ахча ӏодаккхар. Мехкарча шахьарашкара, юрташкара хӏара денна автобусашца дӏа-хьа ухача наха дикка гӏо деш хул из. Картаца ахча дӏадала аьттув хиларо ахча кходарал совгӏа, дикка аттагӏа, паргӏатагӏа ду из гӏулакх. Ахчаш лехаш, тӏормигаш чу хьежа безац наьха, карта дӏатӏадилла, тӏера ахча ӏодаллалца сабар даь, ӏовала мара везац», - белгалдир «Мир» оагӏонцара болх дӏахьоча департамента кулгалхо йолча Точилова Марияс.
Моттигерча минтрансе хьаллаьцар из гӏулакх. Наькъий, машиний гӏулакхех йолча министерствон хьалха латтача Хаматхананаькъан Батыра белгалдечох; Магасе, Наьсаре бахача наха дика аьттув болаш хӏама да из. Гуйран ха хьатӏаоттарца автобусашца лелараш дукхагӏа хул, ахча кходе йиш хилар хӏара денна балха, деша, кхыдолча гӏулакхашка дӏа-хьа ухарашта тоам беш да. Цу гӏулакхаца дувзаденнараш ма дарра довза йиш я vamprӏvet.ru. портале.
