Республикан Ди дездеш столице говзанчий хьехамаш деш хилар мехкара пхьараш
Республикан Ди дездеча дийнахьа Магасерча майдан тӏа Халкъашта юкъера «Пхьарий мохк» яха фестиваль йоаржайир. Хӏаьта мехкарча бахархой аьттув бар тайп-тайпара балхаш пхьараша мишта ду хьажа.
Дахчах тайп-тайпара тамашийна я ала мегаргдола хӏамаш хьакхоллаш волча Оздой Аслана гулбеннарашта йовзийтар ший балхацара кӏоаргаленаш. Цунна бӏарахьежаш цхьацца хӏама хьае шоай аьттув боалий хьожаш хилар бахархой. Дӏахо, дахча доагадеш, догам деш хьадеш долча балхашка хьежар уж. Топпарах тайп-тайпара куцала лелаю хьамаш ше мишта хьаю дӏахьекхар берашта
Угурчанаькъан Фатимас. Совгӏата яла тоам бола хьамилгаш хьае вӏаштӏехьдаьлар берий шоай. Тӏоговзанчий ишкола кулгал деча Султиганаькъан Рамзана гойтар, кхерацара болх малагӏа хӏамаш теркаме лоацаш дӏабахьа беза. Кулгашца сланец, доломит яхача кхерашца дӏахьош бар болх.
Из кхетаче вӏашагӏъеллараш бар «Кулгаговзалий парк» яха кагирхой моттиг, мехкарча хьинар долча кагирхой Союз, культуран гӏулакхех йолча Министерствон, цу оагӏонцарча РФ министерствон грантий новкъосталца.
