Гӏажарий-Юртарча ДК, Коталон 80 шу дизара хетаяь кхетаче хилар
Сийлахь-боккхача Даьймехка тӀем тӀа советски халкъо Котало яьккха 80 шу дизара хетадаь цӀай дӀадихьар Гӏажарий-Юртарча культуран ЦӏагӀа, цига дийцар исторе сий долча оагӀонех, цу юкъе гӀалгӀай къаман бӀухоша дакъа лацарах.
Иштта гулбеннарашта гойтар, цу юкъе дуккха бераш а дар, Брестски крепосте лаьттача тӀем тӀа Барханой Уматгире баьча тӀема исторе оагӀонаш.
«Кхетаче дӀахьоча кийчбаь гойтам безам тӀабодаш бар, цига дар берий сурташ, цар хозйир кхетаче а.
Бераш чӀоагӀа терко тӀайохийташ, безамца хьежар цу исбахьален балхага, шоай ханарча берий сурташка, цига гӀолла царна дайзар Даьхе лораеш лаьттача вай бӀухошта карагӀдаьннараш.
Цу тайпара кхетаченаш дӀаяхьар лоархӀаме да, цо таро лу кагирхошта дика кхетам бала, иштта вай къаман а Даьхен а мах бараш довзийта», - аьлар хоамо.
