ГӀалгӀай метта итт денна хетадаь вӀашагӀкхетар хилар Долакха-Юрта
20.02.2025 11:15
Долакха-Юртарча культуран цӀагӀа дӀадихьар наьна метта итт денна хетадаь вӀашагӀкхетар. Цига гулбелар дешархой, хьехархой. Из хоам «Сердалога» бир Наьсарен кхален администраце зарбан болх лелабераша.
Кхетаче вӀашагӀъеллар яр исбахьален оагӀонцарча балха кулгалду Манкенаькъан Зина. ЛоархӀаме хьаьша волаш, кхетаче вена вар байтанча СаьпарӀаланаькъан Микаил. Ше язъяь наьна мотт хестабеш йола байташ йийшар цо гулбеннарашта.
Къонабарашта юкъе наьна мотт цӀена бувцарах, цунцара лерхӀам массахана лакха лоаттабарах бола болх дӀакхахьарах дийцар гулбеннараша. Дешархоша йийшар цига вай къаман йоазонхой наьна меттала йола байташ.
«ГӀалгӀай метта бека хьаст» яха гойтам дӀабихьар цига библиотека кулгал деча Мисловранаькъан Аминас.
