ГIалгIай йоазонхочох Шадажанаькъан Борисах дийцар мехка
Долакха-Юртарча культуран ЦIен наIараш хьайийллар, къона хьаьший тIаэцаш. «Дешархошта лаьрхIа культура» яхача проектага гIолла, кхетаче дIахьош хилар цига. ГIалгIай къаман цIихезача йоазонхочох, драматургах, публицистах Шадажанаькъан Борисах дувцаш йола кхоллама сайре дIайихьар цига. 80 шу дизар воккхача йоазонхочун.
«Шадажанаькъан Бориса вахара, кхоллама наькъах, гIалгIай литературе цо йитача ларах дийцар кхетаче. Къаьстта терко йир къаман Iадаташ, оамалаш, вIаший барт, безам лорабар дувцаш цо даьча йоазонашта. Йоазонхочун никъ къахьегамах, толамех бизза хиннаб. Цун произведенешта юкъера доакъош дешаш, хIара моттига маIан деш, болх дIабихьар культуран ЦIагIа. ГIалгIай къаман вахарера лоархIаме дола гIулакхаш, оамалаш ювцаш, къамо тхьоврача шерашка денз хьабена никъ бовзийташ ба йоазонхочун кхоллам», - дийцар «Сердалога» культуран цIен исбахьален оагIонцарча балха кулгал деча Манкенаькъан Зинас.
Тахан берашта бIаргадайра Шадажанаькъан Борис къаман литературе сийрда, йоккха лар йита вахалга. Даьхе езаш ураотта Iомаду бераш ишттача йоазоша, хIаьта Бориса кхоллам лоархIаме моттиг дIалоацаш ба цу дерриганена юкъе. Белгалде деза, ишттача кхетаченаша къонача тIехьен боккха пайда белга.
