Долакха-Юрта дӏайихьар «Терроризм йоаца дуне» яха кхетаче
Долакха-Юртарча культуран Цӏагӏа «Терроризм йоаца дуне» яха кхетаче дӏайихьар. Из лаьрхӏа яр терроризма, экстремизма ийрча никъ юхатохара кагирхошта хьехам бара. Цу лоархӏамеча кхетачене дакъа лоацаш хилар хьаьший: Наьсарен кхален администраце кулгалхочун гӏонча Исмейланаькъан Темарлан, администраце вахарца дувзаденнача дешашта долча даькъа кулгалхо Саганаькъан Мадина, администраце хьалхале лелаю говзанча Аькхенаькъан Тимур, моттигерча маьждига имам Манкенаькъан Ӏийса.
«Хьехама къамаьл деш, хьабийхача хьаьшаша кагирхошта дийцар цу воча наькъах лоравала везарах. Говзанчаша тӏахьийхар хӏаравар шоашкара дакъа юкъедара, ийрча гӏулакхаш вайна юкъе нийслургдоацаш, машар, барт, кхерамзле лораяра», - аьлар «Сердало» газетага кхетаче вӏашагӏъеллараша.
Лаьрххӏа йола оагӏув дӏалаьцар культуран Цӏагӏа ӏомалуш бараша. Беканаькъан Белас хоза дӏааьлар «Кукушка» яха илли, хӏаьта Йовлой Хьавас «Даьхе» яха композици гойтар.
Иштта шоай кхоллама программа гойтар Долакха-Юртарча №2 йолча ишкола-берий беша дешархоша. Цар йийшар байташ, хьаьшашта довзийтар хоза кийчдаь «Кхераме доаца дуне» яха зӏамига ловзар .
Кхетачено къаьгга хьагойтар, кхоллам, тешам, цхьоагӏо моллагӏча кхерама духьалъотталуш долга.
