Наркотикашта духьалара кхетаче дӏаяхьа гулбелар Кердача Редантерча культуран Цӏагӏа
«Тхо наркотикашта духьала да» яхача оагӏонцара кхетаче дӏахьош хилар Кердача Реданте. Ураотташ латтача къонача тӏехьенна наркотик яхача дохьажо сага вахар мел чӏоагӏа толхаду хьалхадоаккхаш кхетаче хилар цох. Къонабарашка дийцар, воча хӏама юстара хиларо боккхача толамга кхоачавелгах.
«Берашта хьалхадаьккхар, цкъа цу бӏехача хӏамах хьокхавеннача сага юха меттава, наха юкъе тешаме саг хинна дӏаотта хала хургдолгах. Сага унахцӏенонна, психиканна доккха зе деш, ма дарра аьлча, саг хӏалаквеш дохьаж из долга белгалдир кхетаче дӏахьош хиннараша. Цу бӏехача гӏулакха юкъе чуоза, къонабараш тувлбе гӏертарашка ладувгӏа йиш йоацилга, воча хӏаман тӏехьабаьннарашца цхьаккха тайпара бувзам лелабе йиш йоацилга, хьалхадаьккхар кхетаче», - йоах «Сердалога» культуран Цӏен кулгал деча Хоаной Маретагара бенача хоамо.
Иштта дешархошка дийцар наркотикаш бахьан долаш саг бехктокхаме озаш оттадаьча таӏазарах кӏалхаравоалилга хургдоацилга, цунга хьежжа хӏаравар ший вахара никъ цӏенача, беркатеча гӏулакхашца бийза хила веза.
Дукха хаттараш дар къонабарий кхетаче дӏахьош хиннарашка. Деррига хӏама довзийташ болх дӏабихьар царца боккхагӏчар.
