Галашка хьалъе йолаяьй 120 моттига лаьрхӀа йола ишкол-интернат
Шолжа кхален Галашка Республикански санаторно-хьун ишкола даькъ тӀа «Доазонаш дегӀадоаладара» йолча паччахьалкхен программа чуйоагӀаш, 120 моттига лаьрхӀа ишкол-интернат хьалъе йолаяьй.
ГӀалгӀайчен гӀишлон Министерствос даьча заказах, ГӀалгӀайчен гӀишлон балхаш дӀахьош я «Орбита» ООО яха болхлой тоаба, яхаш, дийцар «Сердало» газетага гӀишлошъераша.
Санаторно-хьун ишкол хьалъяьй 1930 шера, из хӀанз дикка тишъеннай. Из доацаш а, из тӀаэца йиш йолаш яцар деррига бераш, могашал тоае езаш дола. Цудухьа керда ишкол-интернат хьалъе езаш яр.
Кердача, 494 млн. сома маьха йолча гӀишлоно дӀалоац 6 гектарал дукхагӀа дола лаьтта.
«Проекта чудоагӀаш да, берашта дешара эшаш мел дола хьалаш гӀишлон чу хилийтар.
Хьалхарча этажа тӀа хургья музей, гойтама зал, спортивни, актови залаш, лорий кабинет. ШоллагӀча этажа тӀа хургья юххьанцара ишкол, библиотека, дешара зал. КхоалагӀча этажа тӀа чубаха моттигаш хургья къонача дешархошта.
Ков тоадергда, берашта ловза моттигаш кийчъергья, юкъарлонна кхетаченаш дӀаяхьа, волейболах, баскетболах, мини-футболах ловзара майдаш хургья», - аьлар «Сердало» газетага ГӀалгӀай Республикан гӀишлошъяра Министерстве.
