Мехкарча лоамашка цхьаькха шира гӀишло гучаяьлар
ЖӀайрахьа-Ахабоарзен музея болхлошта, лоаман моттигаш тохкаш, вай культураца, истореца дувзаденнараш хоаделар. «Наькъист» яхача гӀалай доазон хьун юкъе зийра цар из моттиг. «Сердалога» из хоам бир музея болхлоша.
Ах хаьрца йола из моттиг малхара кашамаш долаш хиннай. «Овкъара беса болча кхерах яьй из. 50 см кхоачаш да пений сомал, уралатта диса пенаш 1,5 м (малхбузера пен), 3 метрага кхоачаш ба (къулбехьен - малхбоален оагӀув), малхбоален оагӀорахьарча пен тӀа ниӀ яьллай; шорал 0,6 м, лакхал 0,8 м йолаш.
Цхьан гӀатах латташ я из, тхов бац, кӀалхара лард йолаш я 9 кв. метрага кхоачаш. Геттара листа йолча хьун моттиге да из, цудухьа ца зувш укх ханага кхаьчад.
Малхара кашамаш цига хиннилга белгалду дӀадахача бӀаьшерен 50-ча шерашка уж доханза долаш бӀаргадайнараша, Казахстанера нах цӀенах кхийтта ха хиннай из. Цхьацца цӀагӀа лелаю хӀамаш, хьайбай муӀаш, иштта кхыдараш хиннад цига», - дийцар тхога музея болхлоша.
