Лоамашкара гӀалгӀай эггара йоккхагӀа йола гӀала техкар
Эггара йоккхагӀа йола историко-архитектурни ГӀалгӀай лоаман моттиг -Аьрзи. Карарча хана цун доазон тӀа 50 зӀамига нах баьха, 8 тӀема гӀала я, духьалъоттара пенаш а, шера наӀараш а йолаш. Укх деношка, ЖӀайрахьа-Ахабоарзен историко-архитектурни, Ӏалама музея-заповедника болхлой баха хилар цигара хьал тахка, яхаш, дийцар «Сердало» газетага цигарча зарбан болх лелабераша.
Цу гӀалан кӀалха Янд-Каш оала къубба я, цига дӀавелла воалл цӀихеза гӀалаш яь тӀоговзанча Янд, из ваьхав, Ӏилманхоша яхачох, ХVӀӀ бӀаьшере. Къубба чура кораяьй борзах хьаяь аьрзи.
«Кавказ тохкарашта гучадаьлар, из аьрзи Ӏарбий йоазонца го билла хилар. Цу аьрзена гонахьа Ӏилманхоша шоай тохкамий къовсамаш дӀадоладир. ГӀалгӀайчен лоамашка из маца кхаьчай а, мишта кхаьчай а, сенца ювзаенна яьй а яха къовсаме къамаьлаш дар уж. Юххера а, ховш хилар, аьрзи 796 шера, Басре яхача моттиге хьаяьлга, Юхерча Малхбоален ислама искусствон мах болча тӀехьален ха цу тӀа хилар. Мишта кхаьчай из лоаман ГӀалгӀайче? Из хаттар укх ханналца жоп доацаш дус», - аьлар музее- заповеднике.
Белгалду, ГӀалгӀайчен гӀалай моттиге кораяь мах бола къаьнара тӀехьале Ленинграде дӀайихьаяр, говзанчашта хетачох 1931 шера, таханалцца из Эрмитаже а я. ГӀалгӀайчен, цу даькъ тӀа къахьегаш болча болхлоша шоашта могар даьд из юхаяра, бакъда 2013 шера цу тӀара баьккха ло мара юхакхачанзар ГӀалгӀайчен мехктохкама музее.
