Илдарха-Гӏалий тӏа дездир Сийлахь- боккхача тӏема 81 шу дизар
Илдарха-Гӏалан Сийлен парке лаьрххӏа йола кхетаче дӏайихьар, из хетаяь яр Сийлахь-боккхача Даьймехка тӏем тӏа котало яьккха 81 шу далара. Укхаза баьхкар доал деча даькъ тӏара, ӏаьдала болхлой, тӏема гӏо хинна къахьегамхой, иштта лаьрххӏача тӏема операце доакъашхой. Моаршал хоатташ, йистхилар шахьара администраце кулгалхо Дидиганаькъан Ахьмад. Цо гулбеннараш даькъалабийцар Сийлахь-йоккхача Коталон денца.
«Гулбеннараша дӏайихьар дагалоаттама йист ца хула минот. Цул тӏехьагӏа цар зизаш даьхкар 1941-1945 шерашка бейнача турпалхой каш тӏа. Кхетаче чакхйоалаш, шахьара кулгалхочо лаьрххӏача тӏема операце доакъашхошта сийлен грамоташ елар, цо белгалдир цар тахан юкъарлон маьрша вахар хилийтара боккха пайда бахьаш хилар.
Терко йоацаш бисанзар СВО бӏухошта, цар дезалашта новкъостал лоаттадераш а»,- аьлар «Сердало» газетага Илдарха-Гӏалан администраце зарбан болх лелабераша.
Кхетаче дӏахьош концерт хилар, цига дакъа лоацаш дар Илдарха-Гӏалан культура Цӏагӏа ӏомалуш дола «Тӏаргим» яхача халахара ансамблера бераш, иштта Шолжа кхален говзалий берий ишкола дешархой. Къонача иллиалархоша Баьтаранаькъан Хьавас, Йовлой Хьавас, Харсенаькъан Дейсе, Бохтаранаькъан Хадиджас, Султиганаькъан Хадиджас «Са даь-да вахар тӏем тӏа», «Къаьнара вальс», «Сийна йовлакх», «Маьтсела бетта бӏаьсти», «Коталон бӏаьсти» яха иллеш дӏааьлар.
