Магӏалбике тӏема ветераний сий дир
Тӏема сийлен шахьаре Магӏалбике, лаьрххӏа йола дагалоаттама кхетаче хилар. Из хетаяь яр тӏема ветераний Денна. Кхетачен доакъашхоша дагалаьцар, шоай тӏема декхар сий долаш кхоачашдеш, моастагӏчунна духьала лаьттача ветераний. Из болам дӏахьош хиннараш бар единороссаш, шоашта керте моттигерча парте даькъа секретарь Йовлой ӏусман а волаш.
«Даьхен лорабой» ганза вахара болхлочунца цхьана, хьинар дараш даькъалабийцар тӏема ветеранаша, царна баркал аьлар денал, майрал гойташ шоай гӏулакх дӏахьош хиларах.
Дагалоаттама кхетачене дакъа лоацаш хилар лаьрххӏача операце ветеранаш, бӏухой-интернационалисташ, шахьара совета викалаш, юкъарлон болхлой», - аьлар «Сердало» газетага «Цаӏ йола Росси» парте Гӏалгӏай даькъо.
Вай декхар - хӏара тӏем тӏара цӏа ца воагӏаш висача салтечох, эпсарах бола дагалоаттам лорабар, тахан цу тӏема мугӏарашка латтарашта массайолча оагӏорахьара новкъостал дар. Уж ба вай мехка машар хургбола кхоане хьакхоллараш.
