Суртанчий хьажара цӏагӏа хьабелларгба Цхьорой Аюпа гойтам
Хьатӏадоагӏача ерача дийнахьа, Гӏалгӏайчен Паччахьалкхен гойтама цӏагӏа Цхьорой Аюпа лаьрххӏа бола «1944. Дагалоаттама кизга» яха гойтам хьабелларгба. Гойтам хетабаь ба гӏалгӏай къам мехкахдаьккха 82 шу дузаш хилара- ноахалий дегашка цӏаккха йицлургйоаца лар йита исторе оагӏув, яхаш, дийцар «Сердало» газетага Гӏалгӏайчен культуран, туризма Министерствос.
Цхьорой Аюп 1944 шера вай къаманга бена бала бовзийта гӏерт, таханарча вахарга, ший сурташка гӏолла.
Цу кхетаче го йиш я тайп-тайпара балхаш, цо вӏашагӏтох дукха искусствош. Уж езараша дика къоастадергда бесага, кепага, композицега гӏолла суртанчас гойташ дола къам мехкахдоаккхаш йолча ханара денош, из никъ. Цу юкъе гуш да цу ханашка вай къаман вахаре леладаь гӏирсаш, техника, кулгаговзала балхаш, царга гӏолла автор хьож гӏалгӏай ӏадаташ юкъедоаладеш, цу ханашка леладаь вахар гойта.
Суртанча хӏара болх - из ший тайпара исторецара къамаьл да, цар тӏа го таро я дӏаяхача халача ханашкара гӏулакхаш, суртанчас новкъостал ду исторически дагалоаттама мах кхетабе.
