Гӏалгӏайчен Паччахьалкхен галерее хьабийллар, «Пхьари дешархойи» яха гойтам
Гӏалгӏайчен Паччахьалкхен гойтама галерее лаьрххӏа хьайийллар «Пхьари дешархойи» яха проект. Экспозице гойта оттадир халкъа суртанчас, Гӏалгӏайчен суртанчий Союза кулгалхочо, начӏал долча Мартазанаькъан Мусас хьакхелла сурташ.
«Яхььяй Муса дика вовзаш ва республикан бахархошта, начӏал дола суртанча, хьинар дола юкъарлон викал санна. Цо исксствон, юкъарлон вахаре юкъедена дакъа доккха да. Из- кхоллама саг хилар гуш да къаьгга, иштта ше каралаьца гӏулакх дезаш а ва. Мартазанаькъан Мусай вахар дувзаденна да искусствоца, цун хӏара ди диза да кхолламах, гонахьарча дунен хозал наха луш. Ше харжа никъ безаш, ший балха новкъосташа лоархӏаш хьавоагӏа из», - аьлар гойтам хьабеллаш Гӏалгӏайчен культуран, туризма министра гӏончас Куртойнаькъан Маккас.
Мартазанаькъан Мусай хӏара сурт - из дега дакъилг да, кӏоаргга цо еш йола уйла я, Даьхенцара безам ба. Тамашийна начӏал долаш волча суртанчас, долаш дар хувца ховш хиларца, наха довзийт гонахьара дуне.
Шийна ховш дар из тахан дӏалуш ва вай кхувш йоагӏача тӏехьенна, цо уж духхьал сурташ дехка ӏомабаь ӏац, цо хургболча кхоллама болхлошта бовзийт искусствоцара безам, ӏадаташта мутӏахьа хилар.
