Сочера нах баха хилар, Гӏалгӏайчен суртанчий балхаш гойтача Паччахьалкхен фусаме
Мехкарча Паччахьалкхен галерея залашка гӏолла гобоаккхаш хилар, Сочера кхаьча хьаьший. Краснодарерча «Вайнах» яхача юкъарлон Къамий культурай оагӏон кулгал ду Малсаганаькъан Аюп вар хьаьшашта хьалхаваьнна лийннар. Тоабан юкъе бар йоазонхой, журналисташ, Россе Славянски комитета кулгалхо Кикишев Николай; соче-гӏажарий мехка оагӏон хьалха латта Гулямов Фархад; вай мехкарча йоазонхой Союза кулгалхо Ноакастхой Хаваж; Кавказа тохкамхо, фольклорца къахьега Бузуртанаькъан Руслан.
«Лоархӏамеча хьаьшашца экскурси дӏахьош хиннар яр кхоллама болхло йола Аькхенаькъан Хьава. Гӏалгӏай культураца, истореца дувзаденнараш довзийтарах доккха баркал оалаш бар хьаьший. Вӏаший бувзам лелабар хьаллоацаш, Сочерча «Вайнах» яхача Къамий культурай моттига этномузее гойтам хьабелла бийхар цар мехкахой», - дийцар «Сердалога» Паччахьалкхен галерее.
Цхьана проекташ йоаржаяр, кхоллама оагӏонцара бувзам чӏоагӏбеш кхыча мехкашца болх лоаттабар хьаллоацаш хиннаб цига массахана.
