СВО доакъашхой, ветеранаш хилар; мехкарча суртанчий паччахьалкхен музее
Мехкарча суртанчий паччахьалкхен музее хилар тахан СВО бӏухой, ветеранаш. «Даьхен лорабой» яхача ганза болхло вола Темирханаькъан ӏийса вар из гӏулакх вӏашагӏделлар. Гойтама зале гӏолла гобаьккхар лоархӏамеча хьаьшаша. Къаман культуран оагӏонцара тайп-тайпара кулгашца хьакхелла балхаш дайзар Даьхе лораеш латтарашта.
«Экскурси лелаеча Пхьилекъонгий Луизас музея истори, цу чура кхоачам шоаш мишта гулбаьб дийцар хьаьшашта. Хьалхагӏа вӏалла шоашта ца яйна хӏамаш яр Даьхен гӏулакха латтарашта яйнараш, чӏоагӏа тамашийна хеташ хьийжар уж цхьаццадолча балхашка. Доккха баркал аьлар цар музее къахьегарашта, шоай гӏулакх иштта дика дӏахьош хиларах», - дийцар «Сердалога» ИЗО паччахьалкхен музея зарбан болх лелабераша.
Даьхен хӏама лорадеш барашта деналца, майралца шоай декхараш кхоачашдарах баркал аьнна, шоай музея наӏараш царна, цар дезалашта массахана йийлла йолга белгалдир музее къахьегачар.
