Гӏалгӏайчен ИЗО Паччахьалкхен музее Мержой Ленай лаьрххӏа гойтам дӏабихьар
Гӏалгӏайчен Паччахьалкхен исбахьален искусствай музейс лаьрххӏа ший наӏараш хьайийллар, «Шоашта гонахьа хозадар хилийта» яха начIал долча Мержой Ленай гойтам дӏахьош. Из дика совгӏат дар республикан бахархошта, хьаьшашта. Ший хьамсарча мехках лаьца сийрда, хоза, боккха безам бола оагӏонаш гойтар суртанчас.
«Экспозицена чубоагӏа 40 болх, царех хӏарабар исбахьален чулоацам болаш ба. Автора ший сурташка гӏолла гойт, гонахьара дуне ше мишта тӏаэц. Цо дилла сурт ший тайпара йӏовхал луш да. Суртанчас Даькъастен ӏалама хозале гойт, цун хувцамаш белгалду ший суртага гӏолла - лоамашка чухьежа маьлха зӏанараш, цигара хозале, цӏена фо. Цо диллача сурто саг тӏахьех ше-шийца дагавалара», - аьлар «Сердало» газетага ИЗО Паччахьалкхен музея зарбан болх лелабераша.
Мержой Лена – ший цӏи йола говзанча, Россе суртанчий Союза доакъашхо я, цхьа ноахал кхедаь ӏийнаяц из, хьехархо йолаш. Цун дукхагӏа бола кхоллама болх бувзабенна ба Гӏалгӏайченца. Къаьстта из лаьтта да цун кхоллама балхашка дукхагӏа дакъа лоацар.
Гойтам хьабеллар хоза дӏадахар. Цига гулбелар культуран даькъ тӏара викалаш, суртанча новкъостий, гарагара нах, цун кхоллам безаш бола дуккхабараш. Хьалхарча хьаьшаша белгалдир цун ший тайпара хоза кхоллам хилар, цо дилла сурт ший къаьстта белгалдоалаш хилар. Мержой Ленайна доагӏаш дукха хоза дешаш хаза йиш яр цу дийнахьа, иштта баркал оалар цо республике исбахьален говзал дегӏайоалаеш шийгара доккха дакъа дӏалоацаш хиларах.
Мержой Ленай, «Шоашта гонахьа хозадар хилийта!» яха гойтам Гӏалгӏайчен исбахьален говзалий музее дӏахьош хилар - из дика таро я, сихденна дӏахьош дола хӏара деннара гӏулакхаш юха а совцадаь, хозача хӏамах бӏарг тохара, шоашта салоӏам бара.
Цу хозаленга хьажа таро хургья республикан бахархой, лайчилла бетта 2-ча денга кхаччалца.
