«Музея каникулаш» яха болам дӏахьош ба, Гӏалгӏайчен ИЗО Паччахьалкхен музее
Гӏалгӏайчен исбахьален искусствай Паччахьалкхен музее дӏахьош ба, «Музея каникулаш» яха ӏадатий болам. Цу проекта чуйоагӏаш, мехка ишколашка вӏашагӏъехкача лагерашка салоӏаш долча берашта дӏахьош я мах боацаш экскурсеш. Болама керттера маӏан - кхувш йоагӏача тӏехьен культура, истори, Гӏалгӏайчен исбахьален искусство йовзийтар. Дукхача берашта цу тайпара хьамсарча мехка культуран оагӏув хьалхара гуш яр. Хӏара цига вахар, хозача дунен тӏа кхаьчача санна хеталуш хул.
«Укх наькъа музей яхар Илдарха-Гӏалан №1 йолча юкъерча ишколан лагере. Экскурсовода Пхьиленаькъан Луизас дийцар берашта музея балхах, цо царна бовзийтар гӏалгӏай суртанчаш, цар хаттарашта жоп делар. Берашта байзар музея гойтам, дукха къаьстта дола кхоллама балхаш, уж хьакхелларий цӏераш яйзар», - аьлар «Сердало» газетага Гӏалгӏайчен исбахьален искусствай Паччахьалкхен музея зарбан болх лелабераша.
«Музея каникулаш» яхача проекто новкъостал ду республикан берашта; ахкан салоӏа ха безаме, сакъердаме хилийтарал совгӏа, дешара оагӏув а чулоацаш е. Музея наӏараш йийлла я кердача тоабашта, салоӏа ха дӏахьоча ерригача хана.
