ИнгГУ дӀахьоргья гӀалгӀай метта, литературан деношта хетаяь яхь
ГӏалгӀай метта, литературан «Хоза мотт» яхача ГӏалгӀай паччахьалкхен университета филологически факультета клубо «Бовза, беза хьай мотт» яха яхь дӀайихар. Из хетаяь яр гӀалгӀай метта, литературан 10 денна.
Хьаькъале яхьаш дӀаяхьа лаьрхӀар студентий меттацара безам совбоаккхаш; иштта гӀалгӀай метта дешаш, багахбувцама мах бараш довзаш; тоабашца болх бар дегӏадоаладеш, иштта гӀалгӀай меттала гӀалат доацаш йоазув дара таронаш хьаеллаш.
«Яхьашка дакъа лоацаш хилар ерригача факультетий студенташ, филологически факультет цу юкъе а йоацаш. Цу гӀулакха факультетерча пхе студентах латташ йола тоаба вӀашагӀйолла езар, тӀаккха цар тайпан цӏераш болх вӏашагӏбеллачунна дӀаяхьийта езар. Яхь хилар саькура бетта 17-ча дийнахьа», - аьлар «Сердало» газетага ИнгГУ зарбан болх лелабераша.
ГӏалгӀай метта, литературан итт ди тӀахьехаш да къаман меттага гӀолла ноахалий бувзам чӀоагӀбара. Карарча шера итт ди дӀахьоргда, гӀалгӀай мотт шаьрбеш.
