Шолжа-Шахьар-Горагорск яха никъ хозбеш хургья; къахььэсте, кӏарцхала 2,5 эзар га
30 км кхоачаш болча Шолжа-Шахьар-Горагорск яхача наькъа йистошка 2,5 эзар совгӏа къахььэсте, кӏарцхала гаьнаш дӏайогӏаш болх дӏаболабергба, укх бетта 27-ча дийнахьа. Из хоам «Сердалога» бир ӏалама гӏулакхех йолча министерствон болхлоша.
«Экологи» яхача къаман проекта «Лорае хьунаш» яхача паччахьалкхен программага гӏолла дӏахьош болх ба из. Из беркате гӏулакх хьаллаца арабаргба тайп-тайпарча моттигашкара болхлой, «Экосистема» яхача оагӏонцара гӏо деш лелараш, бахархой, иштта «Лорае хьунаш» яхача проектаца бувзам лоаттабеча Сбера корпоротивни оагӏонцара гӏо деш бараш.
«Гуйре эггара дикагӏа йола ха я га дӏайогӏа, хӏана аьлча гурахьа дӏаегӏа га гӏор отталехь овлашца дикка дӏачӏоагӏъеле, йӏовхала зӏанараш лаьтта яржа йолалушшехь, дегӏ да йолалу. Наькъа бӏоаххал дӏаегӏа гаьнаш, экологе хьал тоадарал совгӏа, наькъа куц хоздеш хургья. Еррига гаьнаш дӏаегӏа баьлча, тематически викторина кечъяь, ара яй кхаэлла, салоӏаргда къахьегаш хиннараша», - дийцар тха газетага.
