Гӏалгӏай мехка 652 вахархо яхьеваргва, дикагӏа бола боахам яха цӏи яккха дагахьа
Гӏалгӏай мехка чакхъяьлар хӏара шера дӏахьош йолча, «Зизай фестиваль» яхача яхьа ха. Из чӏоагӏдаьд мехка Кулгалхочо Келаматанаькъан Махьмуд-ӏаьлас. Дикагӏчарех хила бокъо йоаккхаш, яхьеваргва моттигера 652 вахархо, уж ба шоай дехараш дӏадала кхоабаьраш. Кастлуш кхела тоабаш хьожаргья цу боахамий доакъашхоша кийчдаьча боахамерча доазонашка. Хӏара доал деча даькъ тӏа белгалбаьннараш гуш хургба.
«Ялх шу хьалха из яхь дӏайолалуча хана, тха керттера декхар дар нах хьаллацар. Уж бар хӏара денна дӏахьош болча къахьегамца шоай коара моттиг хоза лелаераш, боахамашка даим доал деш къахьегараш. Тахан гуш да из наха хьаллоацаш хилар.
Хӏара шу массаза дала цу юкъе дакъа лаца раьза бараш тӏакхеташ боагӏа, цунца цхьана шоай боахам гойта а, шоашта ховр кхычарна дӏадала а безам бараш дукхагӏа хулаш латт. Гӏалгӏайчен бахархошта доалахьара боахам - из вахара цхьа дакъа да, къахьегам безаш, лаьттанца болх бе безам болаш хилар да. Хоза кийчдаь ков хилча, цу коа вагӏа а дагавала а безаме хул, цу ковна даьй культура цо хьагойт», - аьлар Гӏалгӏайчен Кулгалхочо Келаматанаькъан Махьмуд-ӏаьлас.
Иштта дукха нах цу проекта юкъе дакъа лоацаш хиларо хьагойт вай къаман культура лакха хилар, нах къахьегама тӏера хилар.
Из яхь дӏахьош я дикагӏа дола боахамаш, ковнаш белгалдарал совгӏа, наха цаховш дар хьалхадаккхара, уж къахьегама, хозаленна тӏаберзабара, хӏаране цу гӏулакха безам тӏагӏоргболаш.
