Гӏалгӏай мехка тоаергья, СВО когаш доацаш висача ветерана фусам
«Даьхен лорабой» ганза Гӏалгӏайчен филиала болхлой Беканаькъан Мадина, иштта могашал яйнача наьха хаттараш кхоачашдеш вола Албохчанаькъан Муслим вахар СВО ветеран Албохчанаькъан Амир волча. Иштта царца бар Яндарерча администраце викалаш. Уж цига бахара бахьан дар тӏема даькъ тӏа човнаш хинна заӏапхо малагӏча хьалашка вахаш ва хар.
«Албохчанаькъан Амир СВО вахар 2022 шера. Аргӏанара тӏема декхар кхоачашдеш, из мина тӏа нийсвелар, из бахьан долаш шаккха а ког боацаш висар. Карарча хана из ӏомалуш ва ший вахара хьалашка. Говзанчаша цу цӏагӏа лела бӏухочун аттагӏа хургдолаш цун квартиран бустам баьккхар, лаьрххӏа йола проект тахкара», - аьлар «Сердало» газетага «Даьхен лорабой» фонде.
Цига бахача говзанчаша дика яьккхар цӏагӏара план, чура ченаш мелий, бӏухочун ма деззара уж хьалаш хьакхоллара эшар фуд хьажар.
Производственни бустам боаккхаш, проектно-ахчан каьхаташ тохкаргда. Цу тӏехь бе беза болх сиха дӏаболабергба, ремонт, монтаж яра болх дика чакхбоаккхаргба.
Бӏухочунна лелаш аттагӏа хургдолаш, цу цӏагӏа мел дар дика кхоачашдергда, наӏараш шеръергья. Квартира «Хьаькъале цӏа» яхача таронашца тоаергья, бӏухочун таро хургья оазаца шийна дезар цу чу хьадеха, ше вагӏачара хьал а ца гӏотташ, иштта техниканна, сердалонна тӏехьахьажа. Лаьрххӏа йола мебель оттаергья.
«Даьхен лорабой» ганза моттигерча филиала кулгалхочо Абаьданаькъан Ислама яхачох, цу тайпара таронаш хьакхоллар, паччахьалкхен оагӏорахьара иштта хьаллоацаш, терко лоаттаеш хилар чӏоагӏа лоархӏаме да бӏухошта, уж тӏаккха сихагӏа кхоач маьршача вахарга.
