Унахцӏенон оагӏонца ду гӏулакхаш тоадеш ба мехка
Россе Минздрава кхетаче дакъа лоацаш хилар вай мехкарча цу оагӏон министерствон хьалха латтача ӏалбаканаькъан Зарас кулгал ду тоаба. Из хоам «Сердалога» бир министерствон болхлоша.
«Эггара лоархӏамедарех да бахархошта боаггӏача боараме гӏо лоаттадар, дарба дӏакхахьар, унахошта терко яр таханарча хано дӏадеххача тайпара хилар», - белгалдир ӏалбаканаькъан Зарас, тахан хьалхашка латтача декхарех дувцаш. 2025-ча шера дӏабихьача балхах, 2026-ча шера кхоачашде дезарех дийцар кхетаче. 2030-ча шерга кхаччалца йоаржае езаш я унахцӏенон оагӏонцара хьал тоадарах йола проекташ. Тахан хьадаьнна толашагӏа дола гӏирсаш оттадеш, доккхий хувцамаш деш болх дӏабахьар да цу юкъе.
РФ субъекташта, иштта вай мехка лоархӏаме, лакха терко е езаш болх ба из. Унахошта терко лоаттаяр, цар хьал аттачахьа даккхар доккхача, лерхӏамеча гӏулакхех да тахан. Шоай гӏулакх дика довзаш болча говзанчий кхетачен юкъе дакъа лацар, республикера унахцӏенон оагӏонца дувзаденнараш тоадара тӏехьа дикка пайда беш, кердадараш довзийташ хилар вай мехкарча викалашта.
