Электронни гӀирсаш хьинаре юкъекхувл дешара
![Электронни гӀирсаш хьинаре юкъекхувл дешара](http://serdalo.ru/storage/daDqScjO5dDPjqZyPVF533CcF8O9PSkf4kl83qeS.jpg)
Электронни оагӀонга гӀолла дӀадахьа йиш я, дешара гӀулакхаца дувзаденнараш. ХӀанзчул тӀехьагӀа, бер 1-ча классе дӀаяздайта, кхыча ишколе дӀадига е моллагӀа дехар чудала цӀагӀара арабовла безац ноаной, из деррига Госуслуги яхача оагӀонга гӀолла кхоачашде аьттув ба.
Иштта балха говзал Ӏомаеча юкъерча дешара моттигашка болхарий а ба из аьттув. Каьхаташца дувзаденнача гӀулакхех хьокхабенна Ӏац гӀулакх таьрахьашка дерзадар (цифровизаци). Электронни деноргаш, журналаш, иштта кхыдола хӀамаш чудолхаш йола «Сферум» яха хоамий оагӀув юкъеяьккхай республикерча ишколашка.
Каьхаташцара болх дӀахьош дуккха кӀезигагӀа ха йоаергья цу наькъо; берашта, цар даьшта, ноаношта, хьехархошта юкъера бувзам чӀоагӀбеча пайда бергба. Из хоам «Сердалога» бир дешареи Ӏилмани гӀулакхех йолча министерствос.
Ишколера вахар довза, шоай берий цигарча хьала тӀахьожам лоаттабе аьттув ба даьй-ноаной; хӀаьта, дийша баьннарий, мехкарча моллагӀча вузе каьхаташ дӀачудала йиш я онлайн хьисапе.
«Кердадараш юкъедахарах тарра, из гӀулакх Ӏомаде отта безаш хул хьехархой а, - белгалдир министерстве. - Цу гӀулакха лаьрхӀа программаш я юкъеяьха, царга гӀолла деррига довза, карадерзаде аьттув ба хьехархой».
Дешара электронни оагӀонцара кердадараш юкъекхувлар лоархӀаме, таханарча хано дӀадехаш, дуккхадараш хьалха хинначул аттагӀа хулийташ дола гӀулакх да.