Гӏалгӏай мехка лораду дезалера мах бараш
Долакха-Юртарча культуран Цӏагӏа «Дезалгара дӏадолалу деррига» яха цӏай-кхетаче хилар, из хетаяь яр Халкъашта юкъерча дезала денна. Белггалара чулоацам болча кхетачен доакъашхой бар моттигера дешархой. Карара шу вай мехка, Россе халкъа цхьоагӏон шу, аьнна, белгалдаь да. Дезал - вахара керттера ишкол, кӏийле я, цигара дӏадолалу ӏадаташ лархӏар, шоайла гӏулакх леладар.
«Культуран-салоӏама моттига исбахьален кулгалхочо Манкенаькъан Зинас къамаьл дир моаршал хоаттача дешашца. Цо, хоадам болаш, дийцар Халкъашта юкъерча дезала денах, цун маӏанах. Из белгалду хӏара шера маьтсела бетта 15-ча дийнахьа», - аьлар «Сердало» газетага Долакха-Юртарча культуран Цӏагӏа.
Кхетачен программа дӏахьош яр кхоллама, интеллекта тохкамашца. «Дезала сурт» яхача суртий яхье дакъа лоацаш, дешархоша шоай говзал гойтар, шоашта эггара дукхагӏа безача наьха сурт каьхата тӏа дуллаш. «Дезалера ӏадат» яхача яхье берашта таро елар халкъа хьаькъала оагӏув мишта йовз гойта, шоай цӏагӏа мах бараш дувцача хана кертте латташ дола дешаш дагадохийташ.
Кхетачено дукха сийрда моттигаш йовзийтар доакъашхошта, царна хьалхадаьккхар дезалера бувзамаш чӏоагӏа хила дезилга, ерригача юкъарлонна из керттера долга.
