Вайцигарча 10 эзар дешархошта, студенташта йовзийт профессеш
Дӏадахача шера, ГӏалгӀайчен 10 эзар дешархой, студенташ профессиональни балха говзал Ӏомаеш хилар, яхаш, дийцар «Сердало» газетага ГӀР Кулгалхочун зарбан болх лелабераша.
«Республике иштта дика кхоачашдеш да профессех болча балхага хьажар, «ПромТур» проекта чудоагӀаш говзанча хьехамаш дӀадихьар студенташта лаьрхӀа промышленни предприятешка. Проектах хьакхийтар мехка хьалхале лелаю предприятеш: ООО «Техстрой», ООО «РИАК», ООО «ЗАС «РИАЛ», ООО «АТМ», ООО «ТИМ», АО «ЧӏоагӀа бетон арахеца завод», «Сунжа» яха ООО «Агрокомбинат», иштта кхыяраш.
Йоккхача предприятешка хиларо таро лу професси кӀоаргагӀа Ӏомае, дика говзал караерзае, шоай хургбола болх бовза. Проекта царна хьалхашка хьаелл хургйолча тароний оагӀонаш. Царна бовз хургбола болх лоаттабераш, мехка компанех бола хоам, болх а цун еррига оагӀонаш а кӀоаргагӀа Ӏомаяр, шоай профессех дикагӀа кхетар», - аьлар республикан кулгалхочо Келаматанаькъан Махьмуд-Ӏаьлас.
Республикан ерригача ишколашка юкъейоалаяьй профессе даькъ тӀара ЦаӀ йола кеп. 6-11-ча классай дешархошта дикагӀа йовз профессеш, кхы йола специальносташ «Россия- са доазув» яхача проекте дакъалоацаш хиларах, из кхоачашъеш я РФ Президента Амарах, 2023 шера тов бетта денз.
Из доацаш а лакхерча классашка дагӀа бераш йовзаш да республикан ийс колледжашка дешара, балха оттара таронаш.
ЛоархӀаме да цу тайпара болх дешархошца дӀахьош хилар. Шоай аргӀагӏа дешархоша а кхетаду малагӀа професси шоашта гаргагӀа я, малагӀа дешар шоай дӀахо дӀадахьа деза.
Тахан деррига сиха хувцалуш латт, керда профессеш яржаш я, лакха балха говзал йола болхлой эшаш ба. Цу хьалашка кагирхоша шоаш харжа беза шоай дӀахо дӀабахьа беза вахара никъ.
