11 эзар совгӏа болча даьша, ноаноша дезала доагӏа ахча хьаийцад мехка
Хӏара шерара дезала доагӏаш дола ахча хьаийцар вай мехка 11 эзар совгӏа болча даьша, ноаноша. Из хоам «Сердалога» бера мехкарча паччахьалкхера.
«Россе Вахара ганза республикерча моттига паччахьалкхенгара гӏо доагӏаш болча дезалашта ахча хьахьожадаьд. ӏаьдала ахчанца новкъостал дераш ба къахьегаш бола да, нана, наьха бер леладе хьаийцараш, берашта доал дераш, шиъ е дукхагӏа долча берашка хьожаш. 18 шерга кхаччалца доагӏаш да ахча, хӏаьта хӏара денна дӏаухаш деша вагӏаш вале – 23 шу даллалца.
Тха газетага бенача хоамах, ахча хьахьожадеча хана цу наьха таро миштий хьож. 2025-ча шера цхьан сага хьатӏадоагӏаш дола хӏама мехка цхьаннена оттабаьча 1,5 боарамал лакхагӏа хила йиш яц. Иштта ӏаьдала бокъонца цу сага цӏерах чӏоагӏдаь латта хӏама а теркалду цу балха юкъе. Дехар чуденнача хӏара сага хьалага хьежжа ба оттабу боарам. 2025-ча шера дӏаеннача НДФЛ – га хьежжа хургда из. Масала, 13% латтача йоала борамцара 7% юхалу къахьегаш болча дезалашта, тӏалатта йоала боарам кӏезигагӏа оттабеш.
Ардара бетта 1-ча денга кхаччалца чуэцаш хургба дехар. Кхаь тайпара дӏабахьа йиш я дехарцара болх - интернете гӏолла, Госуслуги яхача оагӏонца, МФЦ офисе, Вахара ганза моллагӏча мехкарча моттиге. Каьхаташка гӏолла тохкам дӏабахьа, деррига къоастаде итт ди лу ганза. Дехар дӏатӏаийцадале, пхи ди далале хьатӏадоагӏаргда ахча.
