Гӏалгӏай мехка 140 совгӏа юкъарлонгара саг вар, хоржамаш мишта дӏахьу хьожаш
Гӏалгӏай мехка дӏахьош дола хоржамаш нийсхон тӏехьа, къайле йоацаш, къаьга дӏадахьара тӏехьа хьожаш ва юкъарлон тӏахьожа 140 саг. Тов бетта 18,19,20-гӏа денош дӏахьоргда еррига республика чулоацаш, цига болх беш да 142 хоржамий дакъа. Тӏахьожама болх дӏахьош лораде деза закон, цхьоагӏо хилар, къайле йоацаш, хоржамаш нийса дӏадахьар. Из кхоачашдара тӏехьара болх дӏахьош ба цахаддаш.
Цу даькъ тӏа, «Сердало» газетага мааллара, дукха нах хьабоагӏаш а, шоашта бакъахьа хетача сага тӏехьа кхадж тоссаш а ба. Кхыметтел цхьан цӏагӏара беррига дезал а хул цхьана кхадж тоссаш. Цу юкъе дика дакъа лоац пенсионераша, бӏухоша. Цо хьагойт вай къам барт болаш хилар. Кхаь дийнахьа республикан хоржамий доакъош болх беш хургда. Гӏалгӏайчен бахархой таро я кхадж тасса 8:00 сахьат даьлча денз 20:00 сахьат даллалца. Кхаь дийнахьа хоржамаш дӏахьош хиларо таро лу нах дукха гоа ца беш сиха дӏабахийта, иштта хӏаране кхерамзле лорае.
