Мехкара эзар совгӏа дешархо ва, лаьрххӏа хьакъоастадаьча деношка ЕГЭ дӏаяла дӏаязваьр
Лаьрххӏа хьакъоастадаьча деношка эзар совгӏа дешархо ва, вай мехка ЕГЭ дӏалуш. Из хоам «Сердалога» бир цу оагӏонцарча министерстве. «Ерригача предметех экзамен дӏалуш вараш укх тӏехьарча шин дийнахьа 1357 саг вар: хьалхарча дийнахьа - 817 саг, шоллагӏча дийнахьа – 540.
Цхьацца бахьанаш нийсдаларах е хьахержа йола предметаш цхьан денца нийслуш хиларах, лаьрххӏа белгалдаьча кхыдолча деношка экзамен дӏалуш хургба дешархой. Боаггӏача боараме, тӏахьожаш лаьрххӏа болхлой болаш, дӏахьош да мехка экзаменашцара гӏулакх», - йоах тхога бенача хоамо.
«Лаьрххӏа денош къоастадар экзаменационни балха юкъе лоархӏаме моттиг дӏалоацаш да, хӏана аьлча хӏара дешархочун экзамен дӏаяла аьттув луш гӏулакх да из. Тха декхар - ЕГЭ дӏалуш болча берригача дешархой гӏулакх хила деззача тайпара чакхдалийтар. Деррига теркалдеш, дӏахьош я тахан мехка экзаменаш», - аьлар дешареи ӏилмани гӏулакхех йолча министерствон хьалха латтача Цхьорой Ахьмад-Башира.
